Բժշկական որոշ ծառայություններ կթանկանա՞ն

Նախարարը չի հերքում կրկնակի հարկման  գործոնը։ Կառավարության երեկվա նիստից հետո լրագրողների հետ ճեպազրույցում առողջապահության նախարար Դերենիկ Դումանյանը չհերքեց, որ «Արտոնագրային վճարների մասին» օրենքի փոփոխությունները, որոնք ուժի մեջ են մտել 2013 թ. հունվարի 1—ից, որոշ պարզաբանումների կարիք ունեն։ Բանն այն է, որ մի շարք ծառայությունների գծով ի հայտ է եկել կրկնակի հարկման խնդիրը. «Կան ծառայություններ, որ, իմ կարծիքով, կրկնակի հարկման են ենթարկվում, մասնավորապես՝ ռենտգեն ծառայությունը, օրթոպեդիկ տեխնիկական սեղանները կամ աթոռները, համալսարանական կլինիկաներում ատամնաբուժական աթոռների խնդիրը, նաեւ զննման կաբինետները։ Այս պահին հարցը քննարկում ենք ֆինանսների փոխնախարարի հետ»։

Ի դեպ, նախարարը տեղեկացրեց, որ համապատասխան ստորաբաժանումներին հանձնարարել է նախարարության գլխավոր ստոմատոլոգի եւ բժշկական կենտրոնների ներկայացուցիչների մասնակցությամբ շատ սեղմ ժամկետում շահագրգիռ կազմակերպությունների եւ այլ գերատեսչությունների հետ ուսումնասիրել հարցերը եւ տնտեսական վերլուծությամբ հաշվարկներով հստակ առաջարկներ ներկայացնել։ Հարկ եղած դեպքում դրանք կներկայացվեն նաեւ կառավարություն։ Ուշադրություն դարձնենք, որ օրենսդրական նախաձեռնությամբ հանդես է եկել ֆինանսների նախարարությունը, առողջապահության նախարարության հետ քննարկել է հարցը, սակայն դրանից հետո փոփոխություններ են կատարվել։ Հիմա, ըստ Դ. Դումանյանի, «շեմի հետ կապված՝ հաշվարկներ են կատարվում, հնարավոր է այն իջեցվի, հնարավոր է՝ չիջեցվի»։ Հիշեցնենք՝ ատամնաբույժների բողոքների համաձայն, եթե խնդիը չկարգավորվի, ատամնաբուժական ծառայությունները կթանկանան։

Հարցեր, պատասխաններ, մեկնաբանություններ